საქართველო არის პირველი ქვეყანა რეგიონში, რომელიც Starlink-ის სერვისებით სარგებლობს, - ამის შესახებ Business Insider Georgia-სთან Lineate Georgia-ს ბიზნეს-განვითარების მენეჯერმა თორნიკე სულაბერიძემ განაცხადა.
მისი თქმით, Starlink-ის დონის კომპანიის საქართველოში შემოსვლა უკვე მეტყველებს იმაზე, რომ საქართველო ნელ-ნელა IT ჰაბის სახელს იმკვიდრებს.
„სამწუხაროდ თუ თვალს გადავავლებთ საერთაშორისო სტატისტიკას საქართველოში 1 მბ ინტერნეტი საკმაოდ ძვირია და სისწრაფეც არაა ფასთან შესაბამისი. ამიტომ ყოველივე აქედან გამომდინარე ყოველი ახალი მოთამაშე ბაზარზე გაზრდის კონკურენციას, რაც გამოიწვევს ფასების კლებას და ხარისხის გაზრდას. Starlink-ი არის ინოვაციური სიტყვა ინტერნეტის მოწოდებაში. რა თქმა უნდა ჩვენ მივესალმებით Starlink-ის შემოსვლას საქართველოში და ასევე მოხარულები ვართ, რომ საქართველო არის პირველი ქვეყანა რეგიონში, სადაც Starlink-ის სერვისებით ისარგებლებენ.
ეს ფაქტიც მეტყველებს იმაზე, რომ საქართველო ნელ-ნელა თავის სახელს იმკვიდრებს, როგორც IT ჰაბი რეგიონში და არამხოლოდ რეგიონში, აღმოსავლეთ ევროპაში. ჩვენ როგორც კომპანია ვგეგმავთ, რომ აქტიურად დავნერგოთ Starlink-ის სერვისები. ჩვენნაირ კომპანიაში მნიშვნელოვანია ალტერნატიული ინტერნეტ წყაროების არსებობა, აქედან გამომდინარე ჩვენ არ ვართ დამოკიდებული ერთ ინტერნეტ პროვაიდერზე და ვცდილობთ, რომ ავითვისოთ ყველა ის ინტერნეტ პროვაიდერი, რომელიც ქვეყანაში იქნება“, - აცხადებს Lineate Georgia-ს ბიზნეს-განვითარების მენეჯერი თორნიკე სულაბერიძე.
Starlink-ის ინტერნეტი საქართველოში უკვე რამდენიმე დღეა ხელმისაწვდომია. Starlink-ის საქართველოს ბაზარზე შემოსვლაზე ეკონომიკისა და მდგრადი განვითარების სამინისტრო აქტიურად აწარმოებდა მოლაპარაკებებს კომპანია SpaceX-სთან, რომელსაც Starlink-ის პროექტი ეკუთვნის.
აღნიშნული შეხვედრების შედეგად, საქართველო განხილულ იყო რეგიონში ერთ-ერთ პირველ საპილოტე ქვეყნად, სადაც SpaceX - ი მოსახლეობას თანამგზავრულ ინტერნეტს მიაწვდიდა.
ილონ მასკის დაარსებული კომპანიის, SpaceX-ის პროექტი Starlink-ი გლობალური თანამგზავრული სისტემაა, რომლის მიზანიც მაღალი სიჩქარის ინტერნეტის მიწოდებაა ნებისმიერ ადგილში, მათ შორის მიუწვდომელ და მაღალმთიან დასახლებებში.
აღსანიშნავია, რომ SpaceX-ის მიერ საქართველოში Starlink-ის პროექტით შემოსვლას და საქმიანობის დაწყებას წინ უძღოდა აშშ-ში, ლოს-ანჯელესში, SpaceX-ის საწარმოში საქართველოს ეკონომიკისა და მდგრადი განვითარების სამინისტროს ხელმძღვანელ პირთა შეხვედრა ამერიკული კომპანიის წარმომადგენლებთან, რომლის დროსაც პირველად გამოითქვა ინტერესი საქართველოსა და SpaceX-ის თანამშრომლობის შესახებ. აღნიშნულს მოჰყვა SpaceX-ის დელეგაციის საპასუხო ვიზიტი საქართველოში. სწორედ აღნიშნული ვიზიტისას გამართული შეხვედრებისას SpaceX - ის საქართველოს ბაზარზე შემოსვლა გადაწყდა.
