პარტნიორობა მოქალაქეთა მხარდასაჭერად - „მეტროპოლსა“ და „ვიანს“ შორის თანამშრომლობის მემორანდუმი გაფორმდა

დეველოპერულ კომპანია „მეტროპოლსა“ და ჰოსპიტლების ქსელ „ვიანს“ შორის ურთიერთთანამშრომლობის მემორანდუმს მოეწერა ხელი. შეთანხმების ფარგლებში „მეტროპოლი“ „ვიანის“ შემადგენლობაში შემავალ ბათუმის მურმან იაშვილის სახელობის დედათა და ბავშვთა ცენტრალურ ჰოსპიტალსა და თბილისის ივანე ბოკერიას სახელობის საუნივერსიტეტო კლინიკაში დაბადებულ ყველა ახალშობილს 100-ლარიან დეპოზიტს გაუხსნის. 

ურთიერთთანამშრომლობის მემორანდუმი თბილისში, ივანე ბოკერიას სახელობის საუნივერსიტეტო ჰოსპიტალში გაფორმდა. დოკუმენტს ხელი მოაწერეს „მეტროპოლის“ გენერალური დირექტორის მოადგილემ, მამუკა იმედაშვილმა და ივანე ბოკერიას სახელობის საუნივერსიტეტო ჰოსპიტლის დირექტორმა, ლაშა ფირცხალავამ. 

მამუკა იმედაშვილი, „მეტროპოლის“ გენერალური დირექტორის მოადგილე: „მოხარულები ვართ, რომ ჰოსპიტლების ქსელ „ვიანთან“ დავიწყეთ თანამშრომლობა. გვსურს, ერთობლივი ძალისხმევით მხარი დავუჭიროთ ჩვენს თანამოქალაქეებს და ეს ჩვენი CSR ხედვის ნაწილია. მათ კეთილდღეობაზე ზრუნვა „მეტროპოლის“ საქმიანობის ძირითადი შემადგენელია, რაც ყოველდღიურობაში სანდო და უსაფრთხო მომსახურების შეთავაზებით გამოიხატება. ახალი პროექტის ფარგლებში ჩვენი სამიზნე აუდიტორია ფართოა და არ არის ფოკუსირებული უშუალოდ „მეტროპოლის“ მომხმარებელზე. თბილისისა და ბათუმის ორ კლინიკაში დაბადებული თითოეული ახალშობილის სახელზე კომპანია 100-ლარიან დეპოზიტს გახსნის და მშობელს გადასცემს. CSR კამპანიის ფარგლებში გათვალისწინებულია საინფორმაციო მხარდაჭერაც - გვინდა, მოქალაქეებს კიდევ ერთხელ შევახსენოთ იმ  სახელმწიფო პროგრამის შესახებ, რომელიც ეხება იპოთეკური სესხების პროცენტის სუბსიდირებას ოჯახებისათვის, რომლებსაც ახალშობილი შეეძინებათ ან სამი ან მეტი შვილი ჰყავთ. იმედი გვაქვს, ჩვენს პარტნიორთან ერთად, დავეხმარებით ოჯახებს საცხოვრებელი პირობების გაუმჯობესებაში“.

 „მეტროპოლსა“ და „ვიანს“ შორის გაფორმებული მემორანდუმის ფარგლებში დაგეგმილი პროექტის განსახორციელებლად საქართველოს ორი ქალაქი, თბილისი და ბათუმი, შეირჩა. განისაზღვრა კონკრეტული სამედიცინო დაწესებულებებიც: „ვიანის“ ქსელში შემავალი ბათუმის მურმან იაშვილის სახელობის დედათა და ბავშვთა ცენტრალური ჰოსპიტალი და თბილისის ივანე ბოკერიას სახელობის საუნივერსიტეტო კლინიკა. „ვიანი“ 7 მსხვილ ჰოსპიტალს აერთიანებს, სადაც თანაბრად ხელმისაწვდომია ამბულატორიული და სტაციონარული მომსახურება.

ლაშა ფირცხალავა, „ივანე ბოკერიას სახელობის საუნივერსიტეტო ჰოსპიტლის დირექტორი: „ბოკერიას ჰოსპიტალი უწყვეტ რეჟიმში მუშაობს სამედიცინო სერვისების განვითარებაზე, რათა ჯანმრთელობაზე ზრუნვა კიდევ უფრო ხელმისაწვდომი გახდეს ჩვენი მომხმარებლებისთვის. ამასთანავე, ბოკერიას ჰოსპიტალი მიესალმება კორპორაციული სოციალური პასუხისმგებლობის ფარგლებში გამართულ კამპანიებს, რომლებიც მიმართული იქნება ჩვენი თანამოქალაქეების კეთილდღეობასა და მხარდაჭერაზე“.

დეველოპერულ კომპანია „მეტროპოლსა“ და ჰოსპიტლების ქსელ „ვიანს“ შორის თანამშრომლობის მემორანდუმის გაფორმების შემდეგ ეს პირველი ერთობლივი კამპანიაა. პროექტის ფარგლებში, „მეტროპოლი“ „ვიანის“ ქსელში შემავალ სამედიცინო დაწესებულებებში სახელმწიფო სუბსიდირების პროგრამის შესახებ საინფორმაციო სტენდებსაც განათავსებს, მომზადდება პოსტერები და დარიგდება ფლაერები. 

ცნობისთვის, სახელმწიფო პროექტის ფარგლებში, ყველა ოჯახს, რომელთაც ჰყავთ 1 წლამდე ასაკის შვილი, შეუძლიათ ისარგებლონ სუბსიდირების პროგრამით იპოთეკურ სესხებზე. პირობების თანახმად, უძრავი ქონების შეძენისა და სახლის აშენების შემთხვევაში, სახელმწიფო ასეთ ოჯახებს სესხის მნიშვნელოვან პროცენტს უფინანსებს. სუბსიდირებით სარგებლობისთვის სესხის მაქსიმალური მოცულობა 200 000 ლარამდეა. 

„მეტროპოლის“ შესახებ: დეველოპერული კომპანია „მეტროპოლი“ საქართველოში 2022 წელს დაფუძნდა. კომპანია ქვეყნის მასშტაბით ოთხ პროექტს ახორციელებს. თბილისში ორი საცხოვრებელი კომპლექსის „მეტროპოლ ბაგებისა“ და „მეტროპოლ ქავთარაძის“ მშენებლობა მიმდინარეობს. ბათუმში კი „მეტროპოლ კუბი“ და „მეტროპოლ ოვალი“ შენდება, სადაც ფრანგულ კომპანიასთან, Louvre Hotels Group-თან თანამშრომლობით 5-ვარსკვლავიანი სასტუმრო Royal Tulip განთავსდება. 

„ვიანის“ შესახებ: „ვიანი“, ქვეყნის მასშტაბით, 7 მრავალპროფილურ ჰოსპიტალს აერთიანებს და უზრუნველყოფს სრულფასოვან ამბულატორიულ და სტაციონარულ მომსახურებას ყველა ასაკის პაციენტისთვის.