თურქეთის მთავრობამ მიწისძვრით მიყენებული ფინანსური ზარალი დათვალა

თურქეთის ხაზინისა და ფინანსთა სამინისტროს კოორდინაციით, სტრატეგიისა და ბიუჯეტის დეპარტამენტმა მიწისძვრის ზემოქმედების ანგარიში მოამზადა. 

ანგარიშის თანახმად, მიწისძვრების ეკონომიკური ზარალი შეფასებულია 2 ტრილიონ ლირად, რაც 2023 წელს მოსალოდნელი ეროვნული შემოსავლის 9%-ს შეესაბამება.

„მიწისძვრის ზარალი 2 ტრილიონი ლირაა (105 მილიარდ 280 მილიონი დოლარი). ეს აჩვენებს, რომ ჩვენ გვაქვს დაახლოებით 6-ჯერ მეტი ზარალი და დანაკარგი, ვიდრე 1999 წელს მარმარილოს რეგიონში მომხდარი მიწისძვრის დროს“, - იუწყება ქვეყნის ფინანსთა სამინისტროზე დაყრდნობით ტელეარხი TRT Haber.

7,7 და 7,6 მაგნიტუდის მიწისძვრები 6 თებერვალს ცხრა საათის ინტერვალით სამხრეთ-აღმოსავლეთ თურქეთში, კაჰრამანმარას პროვინციაში მოხდა.

ბიძგები იგრძნობოდა ქვეყნის 11 პროვინციასა და მეზობელ ქვეყნებში, მათ შორის სირიაში.

თურქეთის ხელისუფლებამ მიწისძვრას "საუკუნის კატასტროფა" უწოდა, ქვეყანაში სტიქიის მსხვერპლი 49 ათასზე მეტი ადამიანი გახდა.