საქართველოს ეკონომიკისა და მდგრადი განვითარების სამინისტროს კურორტების განვითარების სააგენტოს ორგანიზებით, საკურორტო ინდუსტრიის წარმომადგენლებთან გაცნობითი ხასიათის შეხვედრა გაიმართა.
სააგენტოს დირექტორმა, ალექსანდრე ონოფრიშვილმა მოწვეულ სტუმრებს სააგენტოს საქმიანობისა და დარგის ეფექტიანად განვითარების მიზნით დაგეგმილი პროექტების შესახებ მიაწოდა ინფორმაცია.
„ჩვენი პრიორიტეტია აქტიურად ვითანამშრომლოთ კურორტების სექტორის თითოეულ წარმომადგენელთან და განვახორციელოთ კომპლექსური ღონისძიებები, რათა ხელი შევუწყოთ დარგის განვითარებას, ინვესტიციების მოზიდვასა და საქართველოს კურორტების პოპულარიზაციას" - აღნიშნა ალექსანდრე ონოფრიშვილმა.
შეხვედრას დარგობრივი ასოციაციების, სასტუმროებისა და ტურისტული ობიექტების წარმომადგენლები ესწრებოდნენ, რომლებსაც შესაძლებლობა ჰქონდათ, კითხვა-პასუხის რეჟიმში განეხილათ აქტუალური საკითხები. აღინიშნა, რომ სააგენტოს და სექტორის წარმომადგენლებს შორის თანამშრომლობა აქტიურად გაგრძელდება.
საქართველოს ეკონომიკისა და მდგრადი განვითარების სამინისტროს სსიპ კურორტების განვითარების სააგენტო 2022 წლის 15 ივლისს, საქართველოს პრემიერ-მინისტრის ინიციატივით შეიქმნა.
სააგენტოს ძირითადი მიზნებია კურორტების, საკურორტო და ტურისტულად მიმზიდველი ადგილების განვითარება, კურორტებისა და საკურორტო ადგილების კომპლექსური განვითარების ხელშეწყობის მიზნით, კულტურული, ისტორიული, რეკრეაციული ან სხვა ადგილებისა და ობიექტების შესწავლა, მათი განვითარება-პოპულარიზაციის მიზნით შესაბამის უწყებებთან თანამშრომლობა, ინვესტიციების მოზიდვის ხელშეწყობა, კურორტებსა და საკურორტო ადგილებზე მასობრივი სპორტის, სპორტულ-გამაჯანსაღებელი ღონისძიებების ორგანიზების ხელშეწყობა და ა.შ.
სააგენტოს ამოცანაა შეასრულოს მნიშვნელოვანი როლი საკურორტო ინდუსტრიის განვითარებაში ჩართულ სხვადასხვა სახელმწიფო და კერძო ინსტიტუტებს შორის უწყებათაშორისი თანამშრომლობისა და ეფექტური კომუნიკაციის გაღრმავების გზით.
