შავი ზღვის საერთაშორისო უნივერსიტეტი (IBSU) მსურველებს სრულიად ახალ ინგლისურენოვან სამაგისტრო პროგრამას სთავაზობს.
საერთაშორისო აკრედიტაციის მქონე ორმაგი დიპლომის ინგლისურენოვან სამაგისტრო პროგრამა - "მენეჯმენტი და კომპიუტერული მეცნიერება" (Management with Computer Science) უნივერსიტეტისა და გერმანიის ქალაქ ცვიკაუს გამოყენებით მეცნიერებათა უნივერსიტეტთან და 4 პარტნიორ უნივერსიტეტთან (აზიისა და სამხრეთ კავკასიის რეგიონი) თანამშრომლობის შედეგია.
რა უპირატესობები გააჩნია აღნიშნულ პროგრამას:
1) პროგრამაზე ჩარიცხული ყველა სტუდენტი პირველი სემესტრი სწავლობს ცვიკაუს გამოყენებით მეცნიერებათა უნივერსიტეტში, ხოლო მეორე და მესამე სემესტრებს თვითონ ირჩევს პარტნიორი უნივერსიტეტებიდან ერთ-ერთს აზიისა და სამხრეთ კავკასიის რეგიონიდან; მეოთხე სემესტრი ბრუნდება მშობლიურ უნივერსიტეტში სამაგისტრო ნაშრომის დასაცავად, და აქვე აღსანიშნავია, რომ სამაგისტრო ნაშრომის ხელმძღვანელი შესაძლებელია ჰყავდეს ორი, ერთი მშობლიური უნივერსიტეტიდან და ასევე, რომელიმე პარტნიორი უნივერსიტეტის აფილირებული პროფესორი;
2) პროგრამაზე ჩარიცხული სტუდენტი პირველი სემესტრის საფასურისგან სრულიად თავისუფლდება, რადგანაც ამ პერიოდის განმავლობაში ისწავლის ცვიკაუს გამოყენებით მეცნიერებათა უნივერსიტეტში, სადაც სწავლა უფასოა;
3) პროგრამაზე ჩარიცხულ სტუდენტს შეუძლია სტიპენდიაც მოიპოვოს გერმანიაში სწავლის პერიოდში საცხოვრებელი და სამოგზაურო ხარჯების დასაფარად, რომელიც სამოტივაციო წერილისა და გასაუბრების საფუძველზე გაიცემა;
4) და რაც ყველაზე მნიშვნელოვანია, სწავლის წარმატებით დამთავრების შედეგად სტუდენტი მიიღებს IBSU-ს და ცვიკაუს გამოყენებით მეცნიერებათა უნივერსიტეტის მიერ გაცემულ საერთაშორისოდ აღიარებულ ორ დიპლომს შესაბამისი კვალიფიკაციებით.
