„ეფეს საქართველოს” კორპორაციულ საქმეთა დირექტორი ნიკოლოზ ხუნძაკიშვილი Business Insider Georgia-თან ამბობს, რომ 2023 წლის 5 თვის მონაცემებით, კომპანიის ექსპორტი 50%-ით გაიზარდა.
მისივე თქმით, გაიზარდა საექსპორტო ბაზრებიც და „ეფეს საქართველოს” პროდუქცია მსოფლიოს 25 ქვეყანაში გადის.
„ჩვენს ექსპორტის ქვეყნებს დაემატა: ესპანეთი, პოლონეთი, თურქმენეთი და საუდის არაბეთი. ამჯერად ჩვენი პროდუქცია გადის მსოფლიოს 25 ქვეყანაში. უკეთესად ვაკმაყოფილებთ ექსპორტის ზრდის ტრენდს“, - აცხადებს „ეფეს საქართველოს” კორპორაციულ საქმეთა დირექტორი.
მისივე თქმით, ლუდსა და ლიმონათს შუშის ბოთლში ჩამოსასხმელი ახალი ხაზის მონტაჟის შემდეგ საწაროს გარემოზე ზემოქმედება მაქსიმალურად შემცირდა.
„ასევე, ხაზი მინდა გავუსვა, რომ ჩვენთვის, როგორც პასუხისმგებლიანი კომპანიისთვის, ძალიან მნიშვნელოვანია მდგრადობის ხელშეწყობა და გარემოზე ზემოქმედების მაქსიმალურად შემცირება, რასაც ასევე ემსახურება შუშის შეფუთვის წარმოების გაზრდა“,- აცხადებს „ეფეს საქართველოს” კორპორაციულ საქმეთა დირექტორი.
2022 წელს საქართველოდან 4,796.73 ათასი დოლარის ღირებულების 5,082.73 ტონა ლუდის ექსპორტი დაფიქსირდა, 2021 წელს კი ექსპორტზე 2,619.79 ათასი დოლარის ღირებულების 3,075.18 ტონა ლუდი გავიდა.
შესაბამისად ღირებულებით ნაწილში ზრდა 83%-ია, ხოლო მოცულობით ნაწილში 65%-იანი ზრდა დაფიქსირდა.
2022 წელს ლუდის ექსპორტი 30 ქვეყანაში განხორციელდა, თუმცა ყველაზე მეტი რაოდენობით ყაზახეთში.
არსებული მონაცემებით, საქართველოდან ექსპორტირებული ლუდის 27%-ი სწორედ ყაზახეთში გადაიზიდა. საქართველოში წარმოებული ლუდის ექსპორტიორ ქვეყნებს შორის მეორე ადგილზეა ჩინეთი, ხოლო მესამეზე რუსეთში.
