როგორია კომერციული ბანკების მიერ ეროვნული ვალუტით მოზიდული დეპოზიტების მოცულობა და საპროცენტო განაკვეთები

2024 წლის ოქტომბრის ბოლოსათვის კომერციული ბანკების მიერ ეროვნული ვალუტით მოზიდული დეპოზიტების მოცულობამ 28 545,72 მლნ ლარი შეადგინა. მიმდინარე მაჩვენებლები კი 2023 წლის ანალოგიური პერიოდის მაჩვენებლებთან 14%-იან ზრდას აჩვენებს. 2023 წლის ოქტომბრის ბოლოსთვის კომერციული ბანკებში დეპოზიტების მოცულობა 24 999,39 მლნ ლარი იყო. ოქტომბრის მაჩვენებლები სექტემბრის მაჩვენებლებთან 4%-ითაა შემცირებული, რადგანაც 2024 წლის სექტემბრის ბოლოსთვის კომერციულ ბანკებში 29 748,39 მლნ ლარის დეპოზიტები ირიცხებოდა. 

მიმდინარე დეპოზიტებში 52%-ი ვადიან დეპოზიტებზე მოდის - 14 870,27 მლნ ლარი. ვადიან დეპოზიტებში კი ყველაზე პოპულარული 1 წელზე მეტი ვადიანობის დეპოზიტებია, რადგანაც ოქტომბრის ბოლოსთვის ბანკებში მსგავსი ტიპის დეპოზიტების მოცულობა 6 695,70 მლნ ლარი იყო. 

ოქტომბრის ბოლოსთვის მიმდინარე ანგარიშები - 6 548,48 მლნ ლარი იყო, ხოლო დეპოზიტები მოთხოვნამდე - 7 126,97 მლნ ლარი. 

საგულისხმოა, რომ 2024 წლის ოქტომბერში სექტემბერთან შედარებით დეპოზიტების საპროცენტო განაკვეთი გაზრდილია. თუ სექტემბრის ბოლოსათვის დეპოზიტების საშუალო განაკვეთი 9,95%-ი იყო, ოქტომბრის ბოლოსთვის კი 10,10%-ი. 2023 წლის ოქტომბრის ბოლოსთვის დეპოზიტების საშუალო საპროცენტო განაკვეთი 10,85%-ს შეადგენდა.

დეპოზიტებში ყველაზე დიდი საპროცენტო განაკვეთი 1 წელზე მეტი ვადიანობის დეპოზიტებს აქვთ. ოქტომბრის ბოლოსთვის ამ ტიპის დეპოზიტების საპროცენტო განაკვეთმა 12,34%-ი შეადგინა.